نصيحة بسيطة متجربة لكل زوجين يعانوا من الخرس الزوجي والشعور بالوحدة تحت سقف بيت واحد

السعادة الزوجية نصيحة بسيطة متجربة لكل زوجين يعانوا من الخرس الزوجي والشعور بالوحدة تحت سقف بيت واحدنصيحة بسيطة متجربة بعملها انا وجوزي في الوقت الحالي عشان نجدد حياتنا الزوجية وندخل البهجة على حياتنا والحمدالله سعداء بيها جدا ونتايجها هايلة ونيتنا خالصة نكملها لأخر يوم في عمرنا مع بعض عشان نجدد حبنا وحياتنا بعد اصابتنا بمرض الخرس الزوجي الي خفينا منه والحمدالله وعقبال عندكم.

لكل زوجين يعانوا من الشعور بالغربة والوحدة والملل والقرف والمشاحنات وهما عايشين تحت سقف بيت واحد نظرا لضغوط الحياة اليومية وصعوبة مواجهتها وطباعنا وسلوكياتنا وتناقضتنا وتعاملتنا مع بعض الي زي الزفت واخطائنا المتكررة:

رسالتي موجهة للزوجة انها تاخد المبادرة الايجابية اذا عاوزة تحتفظ بحياتها الزوجية مستقرة وسعيدة على قدر المستطاع والامكان لأني من المؤمنين ان الزوجة عليها العامل والعبء الاكبر في حل المشكلة. ومحدش يسألني ليه لأن هي كده, ربنا خلقها كده.

اولا بطلي تعيشي في دور الضحية وبطلي شكوي وبطلي الزن والنكد المتواصل والصوت العالي عشان زي ماانتي عندك جزء من قصة الحياة الزوجية بتقوليه هو كمان عنده الجزء الاخر من القصة عاوز يقوله.

لازم يكون عندك الشجاعة الكافية والصدق انك تعترفي بأخطائك واذا مش قادرة تعترفي بأخطائك لجوزك, اوقفي امام المرآة وراجعي نفسك وكلامك ومواقفك وتصرفاتك وشوفي ايه الي بتعمليه غلط واتوقفي عنه وشوفي ايه الي بتعمليه صح واستمري عليه وحسنيه كمان للأفضل.

اكتر حاجة تخرب بيتك هو انك تحكي وتشتكي لأمة لا اله الا الله عن مشاكلك مع جوزك.  ولو انتي من النوع الي بيدي ودانه لطوب الارض يبقى هيتهد وهيتخرب على ايديكي ان شاءالله.

غريبة جدا انك تحكي للغريب والقريب عن مشاكلك مع جوزك والطرف الاخر الي هو شريكك الوحيد في المشكلة مش بتتكلمي معاه. بتعرفي تتكلمي مع الناس عن جوزك وتشتكي لهم منه بالساعات وجوزك بدل ماتتكلمي معاه بهدوء وتفاهم بتتخانقي معاه.

اوعي تفتكري ان اي حد بتحكي له عن مشاكلك وعلى الاخص الناس الي بتقول لك ياعيني يختي ياقلب امك ياحبيبتي على حظك المنيل دي كانت واقعة مهببة….اوعي تفتكري ان الناس الي بتشحنك وتسخنك بتحبك او خايفة على مصلحتك. ابدا صدقيني, الناس دي هي الي بتخرب البيوت. الناس المخلصة ليكي هي الي تحاول تصلح مش تفسد وتهد. الناس المخلصة ليكي هي الي تواجهك بأخطائك وعيوبك بكل صراحة وصدق. وصدقيني كمان لما اقول لك انهم مش بيحترموكي ولا بيحترموا الراجل او الست الي بيجيبوا في سيرة بعض امام الاغراب. اذا انتي او جوزك من النوع الي بيعيش دور الضحية وبيحب الشكوي ليل نهار, ابسط حاجة اقول لها ليكي وايه الي يجبرك تعيشي مع راجل مش طايقاه ولا هو طايقك , شيل ده من ده يرتاح ده عن ده.

اتزيني لجوزك في البيت زي مابتتزيني وانتي خارجة واحسن كمان. مش لازم ابدا تدخلي المطبخ او تعملي اي حاجة في البيت وانتي منكوشة ولابسة هدوم النوم. خدي دش وحطي مكياج واتزوقي على سنجة عشرة ومارسي حياتك اليومية وخلصي الي وراكي واستعدي لإستقبال زوجك في اجمل صورك.

ان صورتك تكون حلوة دايما سواء داخل او خارج البيت لازم يكون عندك الموضوع ده مبدأ مش موضوع مناسبات وبس. يعني شكلك دايما يبقى حلو عشان نفسك وحالتك النفسية ولو ده مبدأ عندك ثابت يبقى تلقائيا هتتزيني لجوزك لأن ده الي بتعمليه يوميا سواء خارجة او قاعدة في البيت.

الموسيقي بتلعب دور كبير في حياتنا وفي مشاعرنا وبتخلصك من ضغوط وههموم كتير وتخليكي هادية وبتدخل سعادة في حياتك.

نيمي العيال او سربيهم عند اهلك كل فترات متقاربة وحضري عشاء جميل بإيديكي الحلوين على ضوء الشموع وشوية مزيكا وشوية حركات كده  وكأنه اول لقاء بينكم.

شوفي واعرفي كل حاجة ممكن تجدد علاقتك بجوزك ويكون بيحبها او هيحبها واعمليها بدون تردد وابعدي عن العلاقة التقليدية بين الزوج والزوجة الي بتسبب الكأبة والرتابة ودايما جددي في كل حاجة تخص علاقتكم مع بعض لأن مش مفروض يكون في اي خجل او حاجز بينك وبين جوزك. واذا مقدرتيش تعرفي ايه الي بيحبه, اسأليه بشكل مباشر واعمليه. مش عيب انك تسأليه عن اي حاجة وكل حاجة تكون سبب في ادخال السعادة على حياتكم.

المودة والرحمة بين الزوجين 300x251 نصيحة بسيطة متجربة لكل زوجين يعانوا من الخرس الزوجي والشعور بالوحدة تحت سقف بيت واحدافتكري قبل الجواز كان شعورك ايه وكنتي بتعملي ايه وكان قلبك بيدق ازاي وبيطنطط من الفرحة لمجرد سماع صوته في التليفون واعمليه تاني وتالت ورابع و كأنها اول مرحلة الحب والاشواق قبل الزواج.

اوعي تقولي صعب ومينفعش ومستحيل ومفيش وقت. لا ياحبيبتي في وقت وافتكري انتي بتضيعي وقت اد ايه في الكلام عن مشاكلك الزوجية في التليفون مثلا بالساعات, وفري الوقت ده لجوزك واسعديه. بلاش تكركبي الدنيا فوق دماغك. مفيش حاجة اسمها صعب ومستحيل. المستحيل هو انك ماتحاوليش.لانك لو ماحاولتيش تصلحي من نفسك وتاخدي المبادرة, ماتلوميش الا نفسك اذا جوزك بص بره اوحلم بواحدة تانية وهو صاحي او وهو نايم او اتجوز عليكي. انتي الي هتعيطي لوحدك ومحدش هيعيط عليكي على فكرة.

لازم تحافظي على جسمك ومظهرك على قدر الامكان. وعشان يكون عندك ارادة, اوقفي امام المرآة مرة تانية, وبصي لشكل جسمك في المراية, افتكري كام مرة بتقعدي تلبسي وتغيري هدومك عشان مش عجبك جسمك.. افتكري ده كويس وخسي شوية لو بتعاني من وزن زيادة. مش صعب ولا مستحيل بس محتاج ارادة.

لو جوزك من النوع الي سهل ارضاؤه وقلبه ابيض ونفسه ومني عينه يشوف فيكي الصاحبة والحبيبة والعشيقة والزوجة هيتجاوب وهو كمان هياخد مبادرات جميلة زيك وهيقلدك في ادخال البهجة والسعادة على حياتكم.

اما لو جوزك قليل الاصل وقلبه اسود وطفس وعينه يندب فيها رصاصة وعاوز يشوف فيكي كل حاجة حلوة وهو اصلا شوال بطاطا, ومش عاوز يبذل اي مجهود لتجديد الحياة الزوجية, يبقى متجربيش النصيحة دي وربنا يعينك على مابلاكي وينتقم من كل ظالم ومفتري انتقام العزيز المقتدر.

One thought on “نصيحة بسيطة متجربة لكل زوجين يعانوا من الخرس الزوجي والشعور بالوحدة تحت سقف بيت واحد

Leave a Reply